Introdukshon di Evangelionan

Kristianismo ta un fe históriko.  Orígen di kristianismo ta un persona históriko, Hesus di Nazarèt. 

Kon nos sa tokante Hesus?  Algun dokumento sekular (Tásita, Josefo, Suetonio, Talmud, Plinio) ta menshoná Hesus.  Ma kasi tur loke nos sa tokante Hesus nos ta haña skirbí den e kuater Evangelionan: Mateo, Marko, Lukas i Juan.  Nos lo sa kasi nada tokante nasementu, bida, morto, resurekshon i asenshon di e Fundadó i Kabes di kristianismo si no tabata pa e kuater bukinan aki.  For di e promé versíkulo di e Evangelionan (Mateo 1:1) te na e último versíkulo (Juan 21:25), Hesu-Kristu ta e persona sentral.

E Evangelionan ta forma mas òf ménos 46% di Tèstamènt Nobo.  Iglesia antiguo a pone e bukinan aki promé denTèstamènt Nobo, no pasobra nan ta e promé bukinan ku a wòrdu skirbí, ma pasobra nan ta fundeshi históriko i doktrinal pa e restu di Tèstamènt Nobo. 

I.    KIKO TA UN EVANGELIO?

Tin un distinshon entre “e evangelio” i “e Evangelionan.”  Originalmente, e palabra “evangelio” a referí na e bon notisia di salbashon pa medio di Hesus (1 Korintionan 15:1-4).  Mas despues e palabra tabata usá pa un relato biográfiko por eskrito di bida di Hesus.  E kuater dokumentonan yamá “Evangelionan” ta proklamá e evangelio.

Ma nos no por bisa ku e Evangelionan ta puru biográfiko, pasobra e nan no ta konta tur e detayenan di bida di Hesus for di su nasementu te fin.  Kada eskritor a skirbi ku un sierto proposito, i e proposito a determiná ki informashon el a inkluí òf ekskluí tokante bida di Hesus.  Pues, e eskritornan tabata selektivo.  Apòstel Juan a laga sa esaki ora el a skirbi, “Tambe Jesus a hasi hopi otro señal den presensia di Su disipelnan, kualnan no ta para skirbí den e buki aki, ma esakinan a wòrdu skirbí pa boso kere ku Jesus ta e Cristo, e Yu di Dios; i pa keriendo, boso por tin bida den Su nòmber” (Juan 20:30-31).

Por ehèmpel, Mateo i Lukas a duna algun detaye di Hesus Su nasementu i a konta un relato chikitu tokante Hesus ora E tabatin 12 aña.  En kontraste, Marko i Juan a ignorá por kompleto e promé 30 aña di Su bida terenal.  I maske apòstel Juan a mira Hesus hasi hopi milager, el a selektá solamente ocho di Su milagernan pa inkluí den su Evangelio.

Pues, e Evangelionan no ta biográfiko den e sintido ku nan no ta relatonan kompleto.  Na lugá di presentá un relato di tur 33 aña di Hesus Su bida terenal, tur kuater Evangelio ta dediká hopi espasio na Su ministerio di tres aña.  I tur kuater Evangelio ta konsentrá riba e siman promé ku Hesus su krusifikashon i resurekshon.  Di bèrdat e krusifikashon i resurekshon ta haña mas atenshon ku tur sobrá di e bida terenal di Hesus—indikando ku esei ta loke e eskritornan a haña ta mas importante!

Laga nos imaginá ku diferente hende a skirbi un buki tokante Napoleon.  Kada un por konsentrá riba un otro aspekto di su bida: su karera militar, su bida familiar, su polítika, èts.  Kada outor ta selektá ki informashon e ta inkluí òf ekskluí.  Kada un ta enfatisá puntonan sobresaliente ku e ke trese dilanti. 

Ta meskos ku e Evangelionan.  Kada outor di un Evangelio tabata selektivo den lokual el a skirbi…ignorando sierto aspekto di Hesus Su bida.  Nan a skirbi ku un meta.  Nan tabata ke kompartí un siertu mensahe tokante Hesus.  Di bèrdat nos por bisa ku kada Evangelio tabata un sermon, ku tabatin meta pa enkurashá hende pa konfia e Persona úniko aki pa salbashon!  Merrill Unger a skirbi ku e Evangelionan “ta un relato proveéndo e evangelio pa pekadónan den nan nesesidat dor di e persona i obra di Kristu.”  Dios a bira hende pa E por salba hende!

Ademas, en kontraste di un biografia, ta e importante pa komprendé ku e relatonan den e Evangelionan no nesesariamente ta skirbí den un òrdu kronológiko.  Mayoria bes, e relatonan ta kronológiko; ma no tur ora.  Por ehèmpel, ta parse ku e outor a menshoná diferente milager ku Hesus a hasi sin tene kuenta ku kronologia den Mateo 8-9.  Den otro parti di Mateo, e eskritor ta introdusí siñansa di Hesus (Mateo 5-7, 10, 13, 18, 24-25).  Ta pusíbel ku el a inkorporá siñansa ku Hesus a duna na diferente okashon den un “sermon.”

Talbes awendia nos ta haña esei straño.  Ma e tempu ei, esei tabata masha normal.  Ta hopi pusíbel ku Mateo a skirbi asina pa fasilitá memorisashon di loke el a skirbi.

II.   KON E EVANGELIONAN TA DIFERENTE?

Dios a prepará kuater hende pa skirbi tokante Hesus.  Kada Evangelio tin su mensahe distínto!  Ta manera bo ta skucha músika.  Tin diferente instrumènt den e banda òf orkesta.  Kada instrumènt ta kontribuí su zonido distrinto.  Ma tur huntu, nan kontribushon ta resultá den músika plasentro.

E kuater Evangelionan ta meskos.  Nos tin mester di skucha tur kuater Evangelio huntu pa nos por haña e mensahe kompleto ku Dios ke pa nos tende tokante Hesus.

Kada eskritor di un Evangelio a kontribuí un perspektiva diferente.  Kiko tabata e diferente perspektivanan general di e outornan?

E Kuater Evangelionan Kompará

  MATEO MARKO LUKAS JUAN
Lektornan Hudiunan Romanonan Griegonan General—Iglesia
Fecha 50-70 50-70 60-69 80-100
Lugá di Skirbi Antiokia di Siria òf Yèrusalèm Roma Roma Efeso
Stail Instrutor Predikadó Historiadó Teólogo
Palabra prominente “kumpli” “mes ora” “Yu di hende” “kere”
Deskripshon prinsipal di Hesus Mesias Rei profetisá Sirbidó Yu di hende (humano) Hende perfekto Yu di Dios (divino)

Mateo, skirbiendo pa lektornan hudiu a mustra kon Hesus ta desendiente di Abraham i David (E tabata hudiu i tabatin derechu pa sinta riba trono di Israel).  E ta enfatisá ku Hesus a kumpli ku profesianan di Tèstamènt Bieu i ta inkluí hopi charla di Hesus.  E romanonan lo no tabata interesá ni a komprendé esei.  P’esei Marko a skirbi un buki di akshon (“mes ora” 10X den Marko 1), enfatisando loke Hesus a hasi.  Su relatonan ta mas kortiku i ta aparsé un tras di otro.  Lukas a skirbi un buki bon dokumentá pa e griegonan.  Ademas por haña diferente kantika den e buki pasobra su lektornan tabata gusta bunitesa, kultura, i poesia.  Apòstel Juan, disidídu pa komuniká kla ku Hesus ta Dios, a kuminsá ku Hesus Su pre-eksistensia, a selektá milagernan kardinal, i kombersashonnan iluminatorio—tur pa mustra dede riba Su divinidat.

I e manera ku kada buki di e Evangelionan ta klousurá tambe ta distinto, harmonisando ku e proposito di kada outor.  Mateo 28:18-20 ta enserá e mandamentu di e Rei.  Segun Marko 16:20, e Sirbidó ta traha huntu ku Su disipelnan.  Lukas, presentando e humanidat di Hesus ta pinta portrèt di Esun ku a wòrdu tumá ariba bai shelu (Lukas 24:51).  I Juan, demonstrando ku Hesus ta Dios ta klousurá bisando ku ta impusíbel pa konta tur kos di e bida inkreíbel di Hesus (Juan 21:25).

III.  KIKO TA E EVANGELIONAN SINóPTIKO?

Ta bon pa nos tambe pensa tokante e Evangelionan “sinóptiko.”  E palabra “sinóptiko” ta formá di dos palabra griego.  SYN (nifikando “huntu”) i OPTANOMAI (ku ta nifiká “pa mira”) ta komuniká ku e tres Evangelionan aki tin e mésun bista di e bida di Kristu.  E Evangelionan aki ta similar den e tópikonan ku nan ta kubri, e òrdu i e manera di komuniká.  En kontraste, e Evangelio di Juan ta kontené informashon i storianan ku ta kompletamente diferente for di e promé tres Evangelionan.

Foko geográfiko di e Evangelionan sinóptiko ta Hesus Su ministerio na Galilea, mientras Juan su foko ta Judea.  E promé tres Evangelionan ta enfatisá siñansa i parábolanan di Hesus, papiando ku e multitutnan.  Apòstel Juan a enfatisá kombersashonnan personal mas profundo.

Pakiko Mateo, Marko i Lukas ta similar?  Nos no sa kontesta pa e pregunta ei.  Pero tin un teoria interesante.

E eskritornan di e Evangelionan lo a usa informashon ku nan a risibí for di diferente fuente.  Sin duda, nan a skirbi 1) loke nan a tende, mira, òf sa; 2) i loke Spiritu Santu a guia nan pa skirbi (Juan 14:26).  Ma ta bisto tambe ku 3) nan a hasi nan mes estudio di dokumentonan òf a hasi entrevistanan (Lukas 1:1-4).

Talbes Marko a skirbi su Evangelio promé.  Despues di dje, Mateo i Lukas a skirbi nan Evangelionan, hasiendo uso di informashon ku Marko a skirbi huntu ku otro informashon.  Pakiko nos ta pensa ku Mateo i Lukas a hasi uso di Marko su Evangelio?  1) Kasi tur e informashon ku nos ta haña den Marko, nos ta haña similar den Mateo i Lukas.  2) Ora eventonan no ta aparesé den e mésun òrdu kronológiko, Lukas ta harmonisá ku Marko ora Mateo no ta harmonisá ku Marko.  Tambe Mateo ta harmonisá ku Marko ora Lukas no ta harmonisá ku Marko.  3) Nunka Mateo i Lukas ta kontradisí e òrdu kronológiko di Marko.  4) 606 di e 661 versíkulonan di Marko ta similar den Mateo i 380 di Marko su versíkulonan por wòrdu hañá (ku poko kambio) den Lukas.  Tin solamente 31 versíkulo den Marko ku ni Mateo ni Lukas ta inkluí.

IV.  PAKIKO KUATER EVANGELIO?

Diferente persona a skirbi tokante bida di Hesus: “Ya kaba hopi hende a trata di kompilá un relato di e kosnan ku a sosodé meimei di nos…” (Lukas 1:1).  Ma solamente kuater “biografia” ta inkluí den nos Beibel.  E kuater eskritor a skirbi na diferente okashon—separá pa basta aña.

Pakiko Spiritu Santu a dirigí pa pone kuater relato tokante Hesus den Skritura?  Ningun teksto den Beibel ta kontestá e pregunta ei.  Ma nos ke pensa mas aleu tokante esaki.

Kuater relato ta presentá kuater diferente perspektiva.  Ora un fotografo ta saka potrèt di un obheto for di diferente ángulo, nos ta haña un mihó bista di e obheto.  Kada eskritor di un Evangelio tin un perspektiva úniko.  Komo resultado, nos ta haña un mihó bista di nos Señor Hesu-Kristu.  

Kuater Evangelio diferente ta pone e lektor dediká mas atenshon na Hesus.  Si tabatin solamente un Evangelio, probabelmente e Evangelio ei lo ta muchu mas kortiku.  Klaramente Dios tabata ke pa nos para ketu, opservá, studia, i meditá riba nos Salbador presioso, pasobra Hesus ta prioridat! 

Manera nos a mira kaba, kada outor tabatin otro lektor na mente ora el a skirbi su buki.  Mateo a skirbi pa hudiunan, Marko pa romanonan, Lukas pa un griego, i Juan su Evangelio ta pa tur hende di tur kultura.

Talbes ta manera den korte.  Ora un testigu independiente ta komuniká informashon ku ta harmonisá 100% ku testimonio di un otro testigu, esaki ta konfirmá pa hues kiko a sosodé.  Den e kaso di Hesus, tin kuater testigu!

Kada Evangelio ta amplia nos komprendementu.  Kada buki ta agregá informashon i ta klaria loke ta skirbí den un otro Evangelio. 

Spiritu Santu tabatin motibunan válido pa inkluí kuater Evangelio den Beibel.  Nos tin mester di tur kuater!

Un lider di iglesia antiguo, Ireneo (A.D. 185), a duna un idea tokante orígen di e Evangelionan.  El a skirbi, “Mateo a publiká e buki di e evangelio entre e hebreonan na nan mes dialekto, mientras Pedro i Pablo tabata prediká e evangelio na Roma i tabata funda e iglesia.  Despues ku nan a bai (muri?) Marko, e disipel i intrepretadó di Pedro, a duna nos por eskrito lokual Pedro a prediká.  Lukas tambe, un siguidó di Pablo, a skirbi den un buki e evangelio ku Pablo a prediká.  Despues Juan, e disipel di Señor ku tambe a len riba Su pechu, tambe a publiká un Evangelio mientras e tabata biba na Efeso di Asia.”

Si e relato aki ta korekto, nos tin mas idea di orígen di e Evangelionan.  Kada evangelista tabata òf un apòstel òf un sosio di un apòstel.  Marko tabata afiliá ku Pedro den lokual el a skirbi.  E historiadó, Lukas, a kompartí perspektiva di Pablo.  Mateo a skirbi su Evangelio na idioma arameo promé ku el a wòrdu tradusí na griego.  I Juan a skirbi su Evangelio por último for di e stat di Efeso.

Literatura Konsultá

Alexander, David & Patricia ed. Eerdmans’ Handbook to the Bible (Grand Rapids, Michigan: William B. Eerdmans Publishing Company, 1973), p. 468-473.

Baxter, J. Sidlow, Explore the Book (Grand Rapids: Zondervan Publishing House, 1966), vol. V, p. 116-134.

Demaray, Donald E.  Bible Study Sourcebook (Los Angeles: Cowman Publishing Company, 1964).

Gromacki, Robert G.  New Testament Survey (Grand Rapids: Baker Book House, 1974), p. 53-66.

Gundry, Robert H.  A Survey of the New Testament (Grand Rapids, Michigan: Zondervan Publishing House), p. 63-76.

Guthrie, Donald.  New Testament Introduction (Downers Grove, IL: InterVarsity Press, 1970), p. 12-20.

Hadjiantoniou, George A.  New Testament Introduction (Chicago: Moody Press, 1957), p. 89-107.

Jensen, Irving L., Jensen’s Survey of the New Testament (Chicago: Moody Press, 1981), p. 96-111.

Mears, Henrietta C.  What the Bible is All About (Minneapolis: World Wide Publications, 1966), p. 345-353.

Pinnock, Clark H.  “Gospels.”  Tenney, Merrill C. gen. ed. The Zondervan Pictorial Encyclopedia of the Bible (Grand Rapids, MI: Zondervan, 1976), vol. 2, p. 784-789.

Poehnell, Gray.  New Testament Survey notulonan (Prairie Bible Institute: Three Hills, Alberta, Canada, 1983.

Tenney, Merrill C., New Testament Survey (Grand Rapids: Wm. B. Eerdmans Publishing Co., 1961), p.  131-139.

Unger, Merrill F.  Unger’s Bible Handbook (Chicago: Moody Press, 1967), p. 464-469.

Wilkinson, Bruce & Boa, Kenneth.  Talk Thru the Bible (Nashville, TN: Thomas Nelson Publisher, 2002), p. 305-308.