Meimei di e Tèstamèntnan

Ora Tèstamènt Bieu a klousurá ku profeta Malakias, esei a inisiá un periodo di silensio di mas òf ménos 400 aña promé ku eventonan di Tèstamènt Nobo ta kuminsá tuma lugá.  Nos ta yama e period aki “400 aña di silensio” pasobra durante e kuater síglonan ei, ningun profeta di Dios a aparesé.  Malakias a duna di konosé ku Dios ta bai manda “profeta Elias serka boso promé ku binida di e dia grand i teribel di SEÑOR” (Malakias 4:5).  E siguiente profeta ku a presentá na Israel tabata esun ku Hesus a yama “Elias”—Juan Boutista, esun ku a introdusí e Mesias.

Ma ora nos ta bisa ku esaki tabata un period di 400 aña di silensio, esei no ke men ku eventonan históriko no a tuma lugá durante e era ei.  E kuater síglo ei a produsí hopi kambio pa e hudiunan. 

Pensa un ratu tokante algun kambio komparando klousura di Tèstamènt Bieu ku era di Tèstamènt Nobo.  Nota ku tin hopi diferensia polítiko, religioso, kultural, sosial, lingwístiko, èts.

Promé i Despues di e 400 Añanan di Silensio

       400 B.C.       A.D. 28  
PREDIKADóNAN Esdras Nehemias Malakias   Juan Boutista Hesus
PODER POLíTIKO PRINSIPAL   Persia (na oriente) Roma (na oksidente)  
GRUPONAN HUDIU RELIGIOSO Ningun grupo Eskribanan Fariseonan Saduseonan Herodianonan Sanhedrín (Konsilio)  
IDIOMA Hebreo Arameo Griegu  
LUGá DI ADORASHON Tèmpel di Zorobabel Tèmpel di Herodes Snoanan

            Pa nos por komprendé Tèstamènt Nobo mas mihó, ta un yudansa pa nos haña sa kiko a sosodé durante e 400 añanan di silensio.  Pesei, promé ku nos ta introdusí kada buki di Tèstamènt Nobo, nos ke haña un bista chikitu di historia durante e kuater síglonan ei.  Nos ke pensa spesífikamente tokante e areanan polítiko i religioso.

I.    INTRODUKSHON POLíTIKO

Komo resultado di kapricho di Reboam (susesor di Salomon), e nashon di Israel a spat for di otro i a bira dos pais.  “Israel” tabata nòmber di e nashon di nort i e pais na sùit tabata yamá “Juda”.  Ma pa motibu di nan piká, Dios a pèrmití pa tur dos wòrdu konkistá.

A. IMPERIO DI ASIRIA ( 900-612 B.C.)

Asiria a konkistá Israel, e nashon di nort, na aña 721 B.C. i a deportá mayoria di su poblashon.  Rei di Asiria a trese hende for di Babilonia, Kuta, Ava, Hamat i Sefarvaim (2 Reinan  17:24) pa biba na Israel.  E hendenan aki no tabata konosé e Dios di Israel.  Ora Dios a manda leon pa terorisá nan, nan a keha na rei di Asiria i rei a manda un saserdote di Israel bèk pa siña nan kon pa adorá Dios.  Ma nan religion tabata sinkritismo—nan a adorá nan diosnan i tambe Dios (2 Reinan 17:24-34).  E hendenan aki tabata e antipasadonan di e Samaritanonan ku nos ta enkontrá den Tèstamènt Nobo.

B.   IMPERIO DI BABILONIA (626-539 B.C.)

Imperio di Asiria a wòrdu konkistá dor di e kaldeonan.  E kaldeonan a forma un imperio poderoso di Babilonia.

1.   Reinan di Imperio di Babilonia

Pa kuminsá, lo ta bon pa haña un bista di e reinan di imperio di Babilonia.

  • Nabopolassar (626-605 B.C.) tabata fundadó i promé rei di imperio di Babilonia.
  • Nabukodonosor (605-562 B.C.)

      Ora su tata a fayesé, Nabukodonosor a bira rei.  Esaki ta e rei ku nos konosé mas mihó di imperio di Babilonia pa motibu di e relatonan di Daniel 1-4.  Nabukodonosor tabata e rei ku a konkistá e nashon di sùit, Juda, i su kapital, Yerusalèm, na aña 586 B.C.  Babilonia tambe tabatin un polisa di deportashon pa mantené kontròl riba e pueblonan konkistá. 

Nabukodonosor a deportá (ekspulsá) diferente grupo di e pueblo hudiu na vários okashon.  E promé deportashon a tuma lugá na aña 605 B.C.  Daniel tabata entre e katibunan na e okashon ei (Daniel 1:1).  E di dos deportashon a sosodé na aña 597 B.C.  Dos persona ku a wòrdu deportá e tempu aki tabata rei Joakin (2 Reinan 24:8-17) i tambe profeta Ezekiel (Ezekiel 1:2).

Zedekias, último rei di Juda, a rebeldiá kontra Babilonia.  Komo resultado, Nabukodonosor a bolbe ataká Yerusalèm dia 10 di yanüari, 587.  El a logra konkistá e stat dia 9 di yüli, 586 B.C. i a destruí e tèmpel ku Salomon a konstruí.  E di tres deportashon—esun mas grandi—a sosodé despues di e konkísta aki di Yerusalèm.

E siuiente reinan di Babilonia (e promé kuater no ta menshoná den Daniel) tabata:

  • Amel-Marduk (562-560 B.C.)
  • Neriglisar (560-556 B.C.)
  • Labishi-Marduk (556 B.C.)
  • Nabonidus (556-539 B.C.)
  • Belsasar (553-539 B.C.)  Esaki ta e rei menshoná den Daniel 5, kende a reina huntu ku su tata pa un tempu.

2.   Impakto di Eksilio na Babilonia Riba Hudiunan

            Durante tempu ku e hudiunan tabata eksiliado na Babilonia, diferente kambio a tuma lugá.  Nota algun kambio ku ta destaká.

  • Idolatria.  E pueblo di Dios tabatin tendensia pa adorá tur klase di dios falsu na lugá di Yahweh (Yehová)—e Dios bèrdadero.   Idolatria tabata un di e kousanan prinsipal ku Dios a pèrmití pa Su pueblo bai den eksilio.  Ta interesante pa nota ku durante eksilio, e hudiunan a sina nan lès.  For di e tempu ei, nan a faya hopi biaha.  Ma nunka mas nan a adorá idolonan.  Nan a keda klaba firme na monoteísmo.
  • Hudiunan.  For di tempu ku un grupo di e pueblo di Dios a regresá for di eksilio na Babilonia na e tera ku Dios a primintí nan, nan tabata konosí komo “hudiunan,” esta desendientenan òf habitantenan di e tribu di Juda.  Esaki tabata un nòmber nobo pa nan.
  • Diaspora.  Promé ku e eksilio, kasi tur hudiu tabata biba na e tera ku Dios a primintí di duna nan.  Ora e hudiunan a haña pèrmiso pa regresá na nan mes tera despues di e eksilio, hopi di nan no a regresá.  Nan a ked ana Babilonia òf a plama na diferente nashon.  Komo resultado, den Tèstamènt Nobo nos ta ta haña hudiunan tur kaminda.
  • Idioma.  Durante tempu di eksilio e hudiunan a kuminsá skirbi idioma hebreo ku lèternan arameo i poko poko nan a kuminsá papia idioma arameo.  Esaki tabata e idioma ku hende a papia na Israel tempu di Hesus…e idioma ku Hesus lo a papia.
  • Snoanan.  Komo ku tèmpel na Yerusalèm a wòrdu destruí, pueblo di Dios no tabatin lugá mas pa reuní durante eksilio.  Konsekuentemente nan a inventá “snoanan” unda nan por kongregá.  Ora tabatin dies òf mas famia hudiu den un stat, nan a konstruí un snoa.  P’esei den Tèstamènt Nobo tin snoa tur kaminda rònt di Laman Mediteráneo.
  • Eskribanan.  Komo ku e hudiunan tabata asina plamá, nan tabatin mester di mas kopia di e Skrituranan pa kada snoa, pa e kongregashon por tende Palabra di Dios.  Pesei nan tabatin mester di hende ku lo kopia e Skrituranan.  Eskribanan tabata hende ku haña edukashon pa nan por studia e teksto i kopi’é ku eksaktitut.  Nan a bira e teólogonan i siñadónan di hudaísmo konservativo.  I hudiunan a studia Lei na lugá di sakrifiká bestianan.  Ademas, dor ku e Skrituranan tabata na idioma hebreo, nan tabatin mester di hende pa tradusí i splika e teksto na idioma arameo ku nan tabata papia awor.  Esdras tabata un eskriba (Esdras 7:6,11).
  • Rabínan.  Tambe den Tèstamènt Nobo nos ta enkontrá rabínan.  Nan, huntu ku e eskribanan, tabata instruktornan i interpretadónan di Lei di Dios.
  • Tradishon.  E rabínan a skirbi i kompilá e Talmud komo un splikashon di e Lei.  Talmud ta konsistí di dos parti.  Un parti ta yamá Mishná, un buki di reglanan ku nan a kompilá.  E otro parti ta Haggada, loke ta komentario i doktrina di e rabínan. 

E rabínan a forma nan mes tradishonnan i ku frekuensia e hudiunan a pone mas énfasis riba tradishon na lugá di e Skrituranan mes.  Esaki a guia na hopi eror i splikashon ridíkulo.  Ku frekuensia Hesus a kombatí ku e siñansa eronio aki (p.e. Mateo 5:21-48; 15:1-20).

C.  IMPERIO DI MEDIA I PERSIA (539-331 B.C.)

Imperio di Media i Persia a konkistá imperio di Babilonia.  Laga nos mira e reinan i algun evento ku ta sobresalí durante e imperio aki

  • Siro (539-530 B.C.) tabata promé rei di imperio di Medio-Persia.  El a konkistá Babilonia na ana 539 B.C. (Daniel 5).  Maske e tabata rei di Persia promé ku esei, tabata na aña 539 B.C. ku el a bira rei di henter imperio.

Su pólisa, en kontraste di Asiria i Babilonia, no tabata pa ekspulsá i oprimí pueblonan konkistá.  Na lugá di esei, el a enkurashá pueblonan ku a wòrdu deportá pa regresá na nan mes pais.  Mas ku 150 aña anterior, Isaias a profetisá ku un rei, kende su nòmber lo ta Siro, lo hasi esaki (Isaias 44:28 – 45:3). 

E puebel hudiu a keda den eksilio pa 70 aña (605-535 B.C.)—loke Jeremias a profetisá (Jeremias 25:12; 29:10).  Algun hudiu a bolbe na e tera ku Dios a primintí (Esdras 1-4).  Despues ku nan a pone fundeshi di tèmpel, nan a enfrentá oposishon i no a kontinuá ku konstrukshon pa e siguiente 15 aña.

  • Cambises (530-522 B.C.)
  • Durante reino di Darío I (522-486 B.C.), Dios a lamta e profetanan Hageo i Zakarias pa motivá e puebel hudiu pa sigui konstruí.  Nan a obedesé e mensahe di e profetanan i a kaba konstrukshon di tèmpel (516-515 B.C.) segun Esdras 5-6.  Dario I a duna permiso pa nan hasi esaki i asta a yuda finansiá rekonstrukshon di e tèmpel.
  • Asuero I (486-464 B.C.) ta rei di Persia den e relato di Ester.
  • Artaherhes I (464-423 B.C. tabata e rei ku a duna Esdras pèrmit na aña 458 B.C. pa regresá na e tera di Israel pa siña e hendenan (Esdras 7-10).

Algun tempu despues Nehemias a haña permiso di e mésun rei pa bolbe na tera di Israel i pa lamta e murayanan di Yerusalèm (445-444 B.C.).  Ta parse ku esaki no ta referí na e murayanan ku Nabukodonosor a destruí.  Kisas e hudiunan a lamta e murayanan un biaha kaba i enemigunan a kibra e muraya atrobe.  Bou di liderasko di Esdras i Nehemias, revivamentu i reformashon a tuma lugá (Nehemias 8-13).

Ta aki Tèstamènt Bieu ta klousurá i e periodo di 400 aña di silensio ta kuminsá.  Nos intenshon ta pa duna un bista di eventonan importante ku a sosodé durante e 400 añanan ku ningun profeta a aparesé riba pantaya di Israel i ningun buki di Skritura a wòrdu skirbí. 

Durante tempu di Nehemias, Manasés, nieto di e sumosaserdote a kasa ku yu di Sanbalat.  Nehemias a kore kuné.  Segun e historiadó, Josefo, el a bai na Samaria i a lamta un tèmpel riba Seru Gerizim i a establesé e religion di e samaritanonan.

E siguiente reinan i imperio Media i Persia ta listá aki:

  • Darío II (423-404 B.C.)
  • Artaherhes II (404-359 B.C.)
  • Artaherhes III (359-338 B.C.)
  • Arses (338-335 B.C.)
  • Darío III (335-331 B.C.)

En general, puebel di Dios a desfrutá di un tempu di pas i prosperidat durante tempu di imperio di Persia.

D.   IMPERIO DI GRESIA (331-323 B.C.)

Laga nos pensa promé tokante e lidernan di imperio di Gresia

1.   Reinan di Imperio di Gresia

  • Felipe II, konosí komo Felipe di Masedonia, a pone fundeshi pa e imperio griegu dor di uni e estadonan chikitu huntu bou di ún solo mandatario.  El a reina na Masedonia for di 359 te 336 B.C.  Ma e nunka tabata rei di imperio di Gresia.  Ora el a muri, su yu di 20 aña di edat, Alejandro, a bira rei. 
  • Alejandro, konosí komo Alejandro e Grandi (336-323 B.C.), a derotá e persianan tres biaha (334, 333, 331 B.C.) i a konkistá imperio di Media i Persia i a bira e mandatario prinsipal den e mundu konosí e tempu ei.  Esaki a inisiá su serie di viktorianan militar spektakular.

Alejandro a pasa dor di Israel en ruta pa konkistá Egipto (332 B.C.).  No ta konosí pakiko e no a destruí Yerusalèm manera tabata su kustumber ku statnan konkistá.  Tin un storia ku e sumosaserdote hudiu a bin topa Alejandro i a mustré ku Daniel a profetisá tokante su konkístanan (Daniel 7:6; 8:5,21; 11:3) i ku Alejandro tabata asina impreshoná ku el a disidí pa no destruí e stat di Yerusalèm.  Nos no sa si e storia ei ta bèrdat.  Ma nos sa ku Alejandro a trata e hudiunan na un forma favorabel.

Alejandor a muri ku 33 aña di edat na 323 B.C. na Babilonia.  Kousa di su morto no ta konosí. (Keintura kousá dor di malaria, parandiamentu, asesinato ta menshoná komo pusibilidatnan, ma ta spekulashon.)  Nos solamente por imaginá kuantu kambio mas e lo a inisiá si e no a fayesé na un edat asina hóben.  Pasobra e no tabatin eredero, nan a parti su imperio entre e kuater komandantenan (Daniel 8:8,22). 

Komandantenan Cassander a bira mandatario di Masedonia i Lysimachus a bira rei di Trasia i Asia Menor parti pabou.  E otro dos komandante, Ptolemaiko i Antigonus, i nan susesornan a impaktá grandemente historia di Israel.  Ptolomaiko a eredá parti sùit di Siria i Egipto i Antigonus a bira rei di parti nort di Siria i Babilonia.

Seleuko I a derotá Antigonus i a establesé e dinastia di e seleusidanan na aña 312 B.C.  Ptolomaiko, gañando Seleuko, a tuma Israel pa su mes.  Komo resultado nan a bira enemigonan mortal.  E resultado tabata guera entre nan i nan susesornan (e ptolomaikonan kontra e seleusidanan), pa hopi aña (275, 245, 240, 219, 217 B.C.).  E hudiunan a sufri hopi komo resultado pasobra hopi di e gueranan a tuma lugá na teritorio di Israel òf nan ehersitonan a pasa dor di e teritorio hudiu.

2.   Impakto di Gresia Riba Hudiunan

Maske e tabata hóben, su influensia tabata sumamente grandi pasobra e no tabata solamente un sòldá.  Alejandro tabata konvensí ku e sistema griegu tabata e mihó sistema.  Komo resultado, e tabata un “mishonero” ku a prediká e kultura, idioma, religion, ets. griegu.  El a indoktriná mundu ku su sistema griegu.  E kultura i idioma griegu a dominá mundu pa mas òf ménos 600 aña (300 B.C. – A.D. 300).

Griegu a bira un idioma universal…ku hende tabata papia na tur parti di mundu.  Asta despues ku Roma a konkistá mundu konosí i a introdusí nan imperio romano, maske nan idioma tabata latin, griegu a keda e idioma prinsipal pa e siguiente mil añanan. 

Griegu a bira e idioma di hopi hudiu ku tabata biba pafó di Israel.  Komo resultado, nan tabatin mester di Skrituranan na idioma griegu.  P’esei hudiunan a tradusí Tèstamènt Bieu na idioma griegu entre 280-150 B.C.  Esaki tabata konosí komo Septuaginta (òf LXX).  Septuaginta tabata e Beibel di e kristiannan den era di Tèstamènt Nobo.  Maske e Skrituranan hebreo a eksistí, mayoria hende no por a lesa esei.  Nos por kòrda ku Pilato a laga skirbi e “krímen” di Hesus na e tres idiomanan komún na Israel: griegu, arameo, i latin.

E apòstelnan a skirbi Tèstamènt Nobo na idioma griegu.  Ora eskritornan di Tèstamènt Nobo a sita Tèstamènt Bieu, nan a sita e Skrituranan griegu.

Tambe, pa mantené kontrol, mandatarionan a enkurashá hendenan konkistá pa adoptá e kultura griegu.  Alejandro a konstruí mas ku 70 stat (inkluiendo Alejandria na Egipto) i a pone sòldánan griegu na nan.  Griegunan a kasa ku e hendenan lokal i e dos kulturanan a meskla.

Filosofia i religion griegu tambe a plama i a meskla ku e religionnan lokal.  Diosnan lokal a haña nòmber di diosnan griegu.

E.   PTOLOMAIKONAN (323-198 B.C.)

En general kos a bai bon pa hudiunan ora e ptolomaikonan a manda na Israel.  E promé seis rei ptolomaiko ta listá aki:

  • Ptolemeo I – Soter I (305-285 B.C.)
  • Ptolemeo II – Filadelfa (284-246 B.C.)

Tantu Ptolemeo I i II a favboresé e hudiunan.  Hopi hudiu a muda pa siudat di Alejandria na Egipto.  I hopi di nan a papia griegu.  Komo resultado, e hudiunan na Alejandria a kuminsá tradusí e Skrituranan hebreo (Tèstamènt Bieu) na griegu durante reino di Ptolemeo II.

  • Ptolemeo III – Euergetes I (246-222 B.C.)
  • Ptolemeo IV – Filopator – 222-205 B.C.
  • Ptolemeo V – Epifanos (204-180 B.C.)
    • Ptolemeo VI – Filometor (180-145 B.C.)

Un problema mayor ku e pueblo hudiu a eksperensiá tabata e echu ku nan pais tabata lokalisá nèt meimei di e ptolomaikonan i seleusidanan.  Ora nan a bringa kontra otro, ku frekuensia e batayanan a tuma lugá riba nan teritorio.  I esun ku a result viktorioso tabatin poder tambe riba e puebel hudiu.

F.   SELEUSIDANAN (198-166 B.C.)

Resultado di guera di 202-198 B.C. entre e ptolomaikonan i seleusidanan a sali na fabor di e seleusidanan.  Esei a nifiká ku Antioku III a bira mandatarionan di e tera di Israel.  Pasobra e seleusidanan a mira e religion di hudiunan komo un menasa, nan a hasi tur esfuerso pa “helenisá” e hudiunan.  (HELLEN ta e palabra pa griegu.  Pues, “helenisá” ta nifiká pa aseptá e idioma, kultura i religion di Gresia.)  E hudiunan a sufri masha hopi na man di e seleusidanan.  Nos ta lista solamente algun di e reinan di e dinastia aki.

  • Antioko III (223-187 B.C.)
    • Seleuko IV – Filopator (187-175 B.C.)
    • Antioko IV Epifanos (175-164 B.C.) a hasi tur esfuerso pa obligá e hudiunan pa aseptá e religion, kultura, èts. griegu.  E tabata asina fanatiko pa ku esaki ku hende a kambia e nòmber Epifanos (ku a nifiká “e dios revelá”) pa Epimanes (“e loko”).  Antioko Epifanos tabata razu den su persekushon di puebel di Dios.

Antioko Epifanos a bende e sumosaserdosia na Jason, ruman di sumosaserdote legítimo, Onias III.  Despues el a bende e puesto ku Menelaus, kende no tabata famia saserdotal mes.  El a konstruí un sala di gemnastik i lugá pa pusta kore, i hòmbernan sunú a partisipá, manera e griegunan a hasi.  Eventonan deportivo a wòrdu inisiá ku un sakrifisio na diosnan pagano.  Tur esaki tabata ofensivo pa hudiunan.  El a konstruí teatronan griegu i hende mester a haña nòmbernan griegu i bisti manera griegunan.  Asta tabatin sirugía pa kita evidensia di sirkunsishon.

El a invadí Egipto, pais di e ptolemaikonan.  Ma militar romano a bin na ayudo di e ptolemaikonan i a prevení Antioko di derotá nan.  Jason a kere ku Antioko a muri na Egipto i a kore ku Menelaus.  Ora Antioko a regresá for di Egipto, el a baha su rabia riba e hudiunan, i espesialmente Yerusalèm, matando 40,000 di nan, i a hasi sobrevivientenan bira katibu.  Antioko Epifanos a destruí murayanan di Yerusalèm, a hòrta e tesoronan di tèmpel.  El a prohibí hudiunan di praktiká nan religion (sabat, fiestanan, sirkunsishon) i a prohibí nan di poseé òf lesa Tora (Skrituranan).  El a kontruí altarnan pagano tur kaminda den stat di Yerusalèm i a obligá hudiunan pa partisipá den fiestanan pagano i adorashon di diosnan falsu. 

El a hasi tèmpel di Dios un tèmpel di dios falsu, Zeus na desèmber 167 B.C.  Hudiunan a yama esaki “abominashon di desolashon” (Mateo 24:15).  Antioko a pone un altar di Zeus den tèmpel i sakrifika un porko riba altar na onor di Zeus…loke tabata sumamente ofensivo pa hudiunan.  Prostitushon sagrado tambe tabata un parti di e “adorashon” na e tèmpel.

Oposishon a krese di parti di hudiunan deboto, yamando nan mes “Hasidim” (esnan deboto).  E situashon a bira insoportabel pa e hudiunan i esaki a enkurashá e hudiunan pa uni ku un spiritu di nashonalismo. 

Un dia un mensahero di Antioko a yega na e pueblo di Modin ku intenshon pa obligá e hudiunan ei hasi sakrifisio pagano.  Mattathias tabata un saserdote di edat atvansá einan i e mensahero a ofres’é un rekompensa si e lo ta e promé pa sakrifiká komo ku e tabata mas grandi i respetá.  Mattathias a nenga redondamente.  Anto un hudiu a bin na e altar pa hasi sakrifisio.  Mattathias a mat’é i e mensahero di Antioko, i a destruí e altar.  Mattathias i su yunan a hui bai den serunan.  Mas hudiu a djòin ku nan.  Esaki tabata komienso di e revolushon makabeo.

Ki impakto Antioko Epifanos tabatin pa ku loke nos ta mira den Tèstamènt Nobo?

Pa di promé, den e buki di Echunan, e siudat di Antiokia ta bon konosí (Echunan 11:19-26; 13:1) komo e stat for di unda apòstel Pablo a inisiá su biahenan mishonero.  Antiokia tabata kapital di e imperio di Seleusidanan.  Den era di Pablo, Antiokia tabata e di tres stat mas grandi den imperio romano.

Ademas, e persekushon di Antioko Epifanos a kontribuí na e deseo di e hudiunan pa nan Mesias bin.  Nan tabata kiboká, deseándo un Mesias militar i polítiko ku lo destruí e forsanan pagano.  Pesei hopi hudiu no a aseptá Hesus komo nan Mesias.

Ta bon pa menshoná tambe ku tabata durante era di e seleusidanan ku tera di Israel tabata partí na tres sekshon: Judea, Samaria, i Galilea.

G.  MAKABEONAN (166-63 B.C.)

Nos ta kere firmemente ku Beibel ta konsistí di solamente 39 buki den Tèstamènt Bieu i 27 buki den Tèstamènt Nobo.  Dios a inspirá e 66 bukinan ei so.  Iglesia Katóliko Romano ta inkluí mas buki den nan Beibel, yamando esakinan bukinan deuterokanóniko.  Maske e bukinan por ta interesante i por duna instrukshon korekto, tòg tin hopi eror i siñansa falsu den e bukinan ei.  Ma historiadónan ta konsiderá e buki di 1 Makabeonan komo un relato konfiabel i históriko di loke a sosodé durante era di e makabeonan.  E buki no ta inspirá pa Spiritu Santu.  Ma kontenido di e buki ta kuadra ku echunan ku a sosodé den era di e makabeonan.  (Ta interesante ku e buki di 2 Makabeonan no ta konsiderá un buki konfiabel.)  Laga nos pensa tokante e era di e makabeonan.

Sòldánan di Antioko a ataká Mattathias i su grupo i a mata mas òf ménos mil di nan, kimando nan bibu den kuebanan.  E hudiunan a wòrdu derotá pasobra nan a nenga bringa riba dia di sabat.  Mattathias a konvensé nan ku nan por defendé nan mes riba dia di sabat.

Poko tempu despues ku Mattathias a mata e mensahero di Antioko Epifanos, el a fayesé na aña 166 B.C.  Pero su yu hòmbernan a sigui ku e revolushon.

Un yu, Judas (166-160 B.C.), i e forsanan hudiunan a derotá e trupanan enemigu…vários biaha …un viktoria tras di otro…asta ehersitonan grandi.  Judas i su kompatriotanan a kapturá Yerusalèm, a kore ku e sòldánan seleusida, a purifiká e tèmpel, a dedik’é di nobo, a destruí e altar di Zeus i a pone e altar di Dios bèk na su lugá.  Dedikashon di e tèmpel a tuma lugá dia 25 di Chislev (17 desèmber) di aña 164 B.C.  (Hesus a selebrá e fiesta aki den Juan 10:22.  Te awe hudiunan ta selebra esaki—Fiesta di Dedikashon òf Lus, konosí komo Hanuka.)  Judas a haña nòmber di karino “Makabeus” (nifikando “e martin”)…Judas Makabeo.  Esei ta origen di e nòmber “makabeonan.”

Judas a muri den guera, i su ruman, Jonatan, a kontinuá ku e lucha pa 18 aña mas (160-143 B.C.).  Jonatan a wòrdu apuntá komo sumosaserdote.  Un otro ruman, Simon (143-135 B.C.) a negoshá ku Demetrio II, kende tabata buska pa bira rei di Siria.  Su negosiamentu a resultá den independensia pa e hudiunan di Judea!  Simon a bira e sumosaserdote.

Ora Simon i dos yu a wòrdu mata, un otro yu, Juan Hyrcanus (135-104 B.C.) a bira sumosaserdote i mandatario polítiko.  El a funda e dinastia di hasmoneonan.  Durante tempu ku e tabata lider, tabatin hopi pleitu, komplòt, èts. entre e hudiunan. 

Esaki tabata e era ku dos grupo reglioso-polítiko bon konosí pa studiantenan di Tèstamènt Nobo a originá.  Un grupo, siguiendo e tendensia di e era ei, tabata ke pa hudiunan adoptá e kultura, idioma, perspektiva, èts di Gresia.  Nan tabata konosí komo helenisadónan.  E grupo aki tabata despuesto pèrdè algun karakterístika hudiu pa nan por probechá di benefisionan griegu.  For di e grupo aki a bin e saduseonan.  E otro grupo, konosí komo hasidim, a resistí fuertemente kontra e helenisashon di hudiunan.  Nan a boga pa libertat nashonal i di e religion hudiu.  E grupo aki tabata origen di e fariseonan.

Un akto di Juan Hyrcanus ku studiantenan di Tèstamènt Nobo lo haña interestante tabata ku el a destruí e tèmpel ku e samaritanonan a konstruí riba seru Gerizim komo un rival di e tèmpel na Yerusalèm.  E muhé samaritano a referí na e adorashon aki den Juan 4:20.

Promé ku Juan Hyrcanus a muri el a rechasá e perspektiva di e fariseonan i a afiliá ku e mentalidat di e saduseonan.  Su susesor tabata Judas Aristobulus (104-103 B.C.) siguí pa Alejandro Janneus (103-76 B.C.).  Alejandro a buska poder i su propio interes.  Hopi hudiu no a gust’é.  E fariseonan a sera kabes ku e seleusidanan pa kit’é for di su puesto.  Nan a logra.  Ma e fariseonan a teme ku e seleusidanan lo no keda kontentu te ora nan a konkistá henter e pais atrobe, i pesei e fariseonan a bolbe uni forsa ku Alejandro pa kore ku e seleusidanan.  Despues ku nan a derotá e seleusidanan, Alejandro a tuma vengansa i a krusifiká 800 lider fariseo na fiesta di viktoria di e saduseonan.

Susesor di Alejandro Janneus tabata Alejandra (76-67 B.C.) i despues su yu mayó, kende tabata sumosaserdote, Hyrcanus II (3 luna so).  Aristobulus II (67-63 B.C.) a kita e reino for di su ruman, Hyrcanus II.  Ma guera a resultá entre Hyrcanus II i Aristobulus II.  Na aña 63 B.C., probechando di e bringamentu, e komandante romano, Pompeyo, a konkistá Israel.  Komo resultado, Israel a bin bou di poder di Roma.  E romanonan a permití e hudiunan mes pa goberná te 37 B.C.

Ki impakto nos ta mira den Tèstamènt Nobo for di era di e makabeonan?  Kiko tabata algun resultado ku e revolushon makabeo a okashoná? 

  • Tabata durante e era di e makabeonan ku e dos grupo hudiu a forma.  Un grupo—ku tabata prinsipalmente e saserdotenan—tabata pro helenisashon.  E di dos grupo—mas tantu e eskribanan i fariseonan—a haña ku Lei tabata nan outoridat. 
  • Un resultado ligá ku esei tabata ku e puesto di sumosaserdote a kuminsá bira mas di un posishon polítiko.  Nos por mira den e Evangelionan i Echunan ku e sumosaserdote tabatin hopi influensia polítiko, loke no tabata e kaso den tempu di Tèstamènt Bieu. 
  • Tambe durante era di e makabeonan rabi Jehuda kompilá instrukshonnan di siñadónan hudiu di pasado pa forma e buki konosí komo Talmud.  Esaki a konsistí di 1) Mishná—leinan oral, i 2) Gemara—komentarionan tokante Mishná.  Te awendia esaki ta altamente apresiá pa hudiunan.

H.  IMPERIO ROMANO – 63 B.C. – A.D. 70

Imperio romano a eksistí pa hopi aña despues di A.D. 70, pero nos estudio lo no hiba nos muchu mas despues di A.D. 70.

Diferente reinan ku nos ta enkontrá den Tèstamènt Nobo tabata yama “Herodes.”  Tur di nan a reina ku aprobashon di imperio romano.   Esun promé tabata Herodes e Grandi, siguí pa diferente di su susesornan ku tambe tabatin e nòmber Herodes.  Laga nos pensa tokante e Herodesnan.

  1. Herodesnan den Tèstamént Nobo

Herodes e Grandi (37-4 B.C.) a lamta komo hudiu na un pais bisiña di Israel, Idumea.  Ku 22 aña di edat, Herodes a kaptura Yerusalèm, ku yudansa di e romanonan i nan a dun’é e título “Rei di Hudiunan.”  Esaki tabata e Herodes ku tabata reina tempu ku Hesus a nase.

Herodes no tabata un hudiu religioso.  E no tabata popular serka e hudiunan pasobra e tabata desendiente di Idumea (desendientenan di Esau), su bida inmoral, su belasting pisá, i su krueldat.  Di bèrdat Herodes tabata sumamente kruel.  El a mata tur persona ku tabatin potensial di ta un rival pa su puesto.  El a mata por lo ménos dos di su esposanan, tres di su suanan, su suegra, i tres yu hòmber.  El a duna òrdu pa mata hopi lider hudiu ora e muri pa e hudiunan yora ora e muri.  Esaki ta kuadra presis ku su mentalidat ora e sabionan a bin Yerusalèm buskando e “Rei di Hudiunan” (Mateo 2), matando tur beibi maskulino bou di dos aña di edat.

Herodes a buska fabor di e hudiunan dor di su konstrukshon.  El a konstruí hopi edifisio i stat, por ehèmpel Cesarea, Masada, Herodium, èts.  Ma esun prinsipal tabata re-konstrukshon di e tèmpel di Yerusalèm.  Esaki tabata e tèmpel for di era di Esdras ku Herodes a ekspandé.  A tuma 46 aña (Juan 2:20) pa kompletá e konstrukshon mahestuoso…loke tabata e tèmpel den era di Hesus i e apòstelnan

Ora Herodes e Grandi a muri poko despues di nasementu di Hesus, e bèrdadero “Rei di hudiunan” (na aña 4 B.C.), emperadó Augusto a disidí ku ningun di Herodes su yunan mester tin henter e reino.  El a parti e reino entre su tres yunan: Arkelao, Herodes Felipe, i Herodes Antipas.  Nos ke pensa un tiki mas tokante kada un di e tres reinan aki.

Arkelao (4 B.C.-A.D. 6) a reina riba Judea, Samaria i Idumea.  E tabata kruel manera su tata i a mata 3000 hudiu pa preveni un revolushon kontra dje.  Mateo 2:22-23 ta laga sa ku Jose, tata di kriansa di Hesus, no a konfia pa biba den Arkelao su teritorio.  P’esei el a bai biba na Galilea teritorio di Herodes Antipas.  E habitantenan di Judea i Samaria tabata asina fadá di Arkelao su krueldat ku nan a manda un delegashon na Roma pa pidi emperadó Augusto pa kit’é for di su puesto komo rei.  Augusto a hasi konforme nan petishon i a pone Judea bou gobernadónan romano.

Herodes Felipe (4 B.C.-A.D. 34), konosí tambe komo Felipe e tetrarka (Lukas 3:1), a manda riba Iturea, Trakonitis, Gaulanitis, Batanea i Auranitis.  E tabata un mandatario hustu i e suidadanonan di e paisnan aki a gust’é.  El a konstruí Cesarea di Felipe i Bètsaida. 

Herodes Antipas (4 B.C.-A.D. 39) tabata rei di Galilea i Perea—teritorio unda Hesus a lamta komo muchu.  Esaki ta e Herodes prinsipal ku nos ta enkontrá den e Evangelionan (despues ku Herodes e Grandi a fayesé).  E tambe tabata un tetrarka (Mateo 14:1; Lukas 3:1; 3:19; 9:7; Echunan 13:1).  El a konstruí Tiberio.

Herodes Antipas tabata e responsabel pa morto di Juan Boutista.  Ora e tabata bishitá su mitar ruman, Felipe (no e tetrarka) el a sera konosí ku Herodias, Felipe su esposa.  El a divorsia su promé esposa i a kasa ku Herodias.  Juan Boutista a denunsi’é pa esaki i Herodes a enkarsel’é.  Herodias, probechando di baliamentu di su yu muhé, Salomé, a logra mata Juan (Mateo 14:1-12).

Hesus a yam’é “zoro” (Lukas 13:32).  Komo ku Herodes Antipas tabata un hudiu, e tabata na Yerusalèm pa e fiesta di Pasku tempu di krusifikashon di Hesus.  Hesus a presentá su dilanti pa wòrdu huzgá (Lukas 23:7-12). 

Herodes Agripa I, ruman di Herodias, a konvensé emperadó Kalígula ku Antipas no tabata leal na emperadó i Kalígula a kore kun’é i duna su puesto na Agripa.

Nos ke pensa tokante dos otro susesor despues di e tres yunan di Herodes e Grandi.

Herodes Agripa I (A.D. 37-44) tabata bon amigo di emperadó Kalígula.  Un di e emperadó nobo su promé aktonan tabata pa duna Agripa e teritorio ku tabata pertenesé na Felipe promé ku su morto.  E tambe a haña teritorio di Herodes Antipas.  Depues ku emperadó Kalígula a muri, el a bira rei di Judea i Samaria tambe.  Herodes Agripa I tabata un hudiu deboto, a adorá na e tèmpel regularmente, i a sigui e leinan hudiu.  Ma e tambe a persiguí kristiannan, matando Santiago i enkarselando Pedro (Echunan 12).

Heodes Agripa II (A.D. 50-100) tabatin bon konosementu di e religion hudiu, ma su interes tabata superfisial so.

Prokuradó Felix (A.D. 52-59) tabata kasá ku ruman di Agripa II, Drusila, i tabatin kontakto frekuente ku Pablo (Echunan 23-24).  Ora Festo (A.D. 59-61) tabata prokuradó di Judea, Agripa II a bishit’é huntu ku su ruman muhé, Berenise (Echunan 25:13).  Pablo a hasi su apelashon i proklamashon di e evangelio tantu dilanti di Festo komo Agripa (Echunan 25:23 – 26:3

Eseinan ta e Herodesnan ku nos ta enkontrá den Tèstamènt Nobo.  Nan a reina ku outorisashon di emperadó romano.  Tambe den Tèstamènt Nobo nos ta enkontrá prokuradónan—gobernadónan romano. 

  • Prokuradónan Romano den Tèstamént Nobo

Ora emperadó Augusto a kita Arkelao for di su puesto na aña A.D. 6, el a hasi Judea un provinsia romano, goberná pa prokoradónan romano ku emperadó mes a apuntá.  E prokoradónan mester a duna kuenta dirèkt na emperadó.

En general, nan a biba na kosta, na Cesarea, i a bin biba temporalmente na Yerusalèm solamente na okashonnan spesial (fiestanan hudiu) ora tabatin mester di mas trupa na e fòrti di Antonia, lokalisá na Yerusalèm.  Mayoria prokoradó tabatin mal reputashon, asta na Roma, pa motibu di nan opreshon di e huduiunan i robamentu.

Tabatin 14 prokuradó for di aña A.D. 6 te tempu ku e romanonan a destruí Yerusalèm.  Ma nos lo nota solamente esnan ku Tèstamènt Nobo ta menshoná.  Nos ya kaba a menshoná dos di nan.  Ma lo ta bon pa haña un bista mas amplio di nan.

Ponsio Pilato (A.D. 26-36) tabata e di sinku prokuradó na Judea.  E no a hasi kaso di e kustumbernan i derechunan di e poblashon hudiu.  Kasi el a kuminsá un revolushon ora el a purba trese e símbolo di Roma den Yerusalèm.  E hudiunan a konsiderá esei un violashon di e Dies Mandamentu: “No traha ningun imagen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera…” (Eksodo 20:4).  Pilato tambe a hòrta plaka for di e tèmpel pa e por konstruí un akuadúkto pa Yerusalèm.  E hudiunan a protestá i soldánan di Pilato a obligá nan pa stòp di protestá.  Talbes Lukas 13:1 a referí na “…galileonan, kende nan sanger Puilato a meskla ku nan sakrifisionan.”  Pilato ta mihó konosí pasobra el a laga ehekutá Hesus pa komplasé ku deseo di e hudiunan, maske e tabata konvensé ku Hesus ta inosente (Juan 18:28 – 19:16).  Algun aña despues, ora Pilato a mata algun samaritano, mandatarionan na Roma a eksigí pa e regresá na Roma pa wòrdu huzgá pa su mal komportashon.

Nos a menshoná e prokuradó ku tabata yama M. Antonius Felix (A.D. 52-59).   Felix tabata prokuradó mas òf ménos 16 aña despues di Pilato.  Nos a menshoná kaba ku esaki tabata e Felix di Echunan 23-24 dilanti kende Pablo a presentá.  Felix tambe a haña òrdu pa regresá na Roma pa motibu di su mal komportashon.

Susesor di Felix tabata Porsio Festo (A.D. 59-61).  E tabata unbon prokuradó.  Ma lástimamente el a fayesé despues di goberná solamente dos aña.  Esaki ta e Festo di Echunan 24:27 – 26:32.

Prokoradónan (Gobernantenan) di Judea

   Fecha    (A.D.)   Nòmber   Evento   Skritura
6-10 Coponius    
10-13 M. Ambivius    
13-15 Annius Rufus    
15-26 Valerius Gratus    
26-36 Ponsio Pilato   A mata hende di Galilea Krusifikashon di Hesus Lukas 3:1 Lukas 13:1 Lukas 23:1
36-38 Marcellus    
38-41 Maryllus    
41-44 Ningun—Herodes Agripa I a manda riba henter Palestina Echunan 12
44-46 Cuspius Fadus    
46-48 Tiberius Alexander    
48-52 Ventidius Cumanus    
52-59 M Antonius Felix Rat di Pablo Echunan 23-24
59-61 Porcius Festo Rat di Pablo Echunan 24-27
61-65 Albinus    
65-70 Gessius Florus A hòrta tesoronan di tèmpel i hudiunan a rebeldiá.   
70   Yerusalèm a wòrdu destruí  
72 Vettulenus Cerialis    
72-75 Lucilius Bassus    
75-81 M. Salviennus    
81-86 Flavius Silva    
86 Pompeius Longinus    
  • Revolushon Kontra e Romanonan

E nashon hudiu a someté obligatoriamente na outoridatnan romano.  Ma nan a rekonosé e saserdosia i Sanhedrin komo nan mandatatrionan supremo.  E hudiunan a paga e belasting di tèmpel i tambe belasting romano. E belasting total ku nan mester a paga por a yega 40%.

Despues di morto di Festo kos a peorá pa e hudiunan.  Korupshon di tantu e romanonan komo e lidernan hudiu a resultá den revolushon di hudiunan kontra e romanonan (A.D. 66-74).  Zelotenan—hudiunan ku tabata ke tumba e mandatarionan romano dor di akshon violento—a logra konkistá Yerusalèm.  Ma e guera a bira mas kompliká pasobra tambe tabatin guera sivil entre gruponan hudiu.  E komandante romano, Vespasiano, a bolbe konkistá Judea, ku eksepshon di Yerusalèm, tempu ku e hudiunan tabata bringa kontra otro na Yerusalèm.  Anto emperadó Nero a muri.  Vespasiano a bai Roma pa e por bira emperadó susesor di Nero.  El a laga su yu, Tito, pa kompletá e konkísta di Yerusalèm.  Komo resultado di hamber i guera sivil Tito a kapturá Yerusalèm na ougùstùs di aña A.D. 70 i a destruí e stat i e tèmpel.  E hudiunan a wòrdu matá òf bendé komo katibu.

Un grupo di hudiu a skapa i a kontinuá ku nan revolushon for di Masada.  E romanonan a konkistá Masada na aña A.D. 74 ma a deskubrí ku e 900 hudiunan a mata nan mes na lugá di someté na e romanonan.

Na aña A.D. 135, un otro revolushon a lamta bou guia di Simon Bar Kochba.  Emperadó Adriano a derotá e hudiunan i el a deklará ku Yerusalèm ta un stat romano, prohibiendo hudiunan pa drenta e stat bou pena di morto.  Un tèmpel a wòrdu konstruí pa onor di Jupiter unda e tèmpel tabata.

E nashon hudiu a peresé, ma no e hendenan, ni e religion.  Fariseonan i rabínan a sigui instruí e hendenan.  Studiamentu di Lei a bira a punto prinsipal (pasobra sakrifisionan no tabata pusíbel dor ku e tèmpel tabata destruí).  Nan a establesé un skol na Jamnia na A.D. 90 pa studia e Lei.

Emperadónan Romano durante Promé Síglo

Fecha Nòmber Eventonan Skritura
30 BC – AD 14 Augusto Nasementu di Hesus Lukas 2:1
A.D. 14-37 Tiberio Ministerio i morto di Hesus Lukas 3:1
A.D. 37-41 Kalígula A demandá pa hende ador’é  
A.D. 41-54 Klaudio Hamber Ekspulshon di hudiunan for di Roma Echunan 11:28 Echunan 18:2
A.D. 54-68 Nero Rat di Pablo Kimamentu di Roma Morto di Pedro i Pablo Echunan 25:10; 28:19   2 Timoteo 4
A.D. 68 Galba    
A.D. 69 Otho    
A.D. 69 Vitellius    
A.D. 69-79 Vespasiano Destrukshon di Yerusalèm  
A.D. 79-81 Tito    
A.D. 81-96 Domiciano    
A.D. 96-98 Nerva A persiguí iglesia  
A.D. 98-117 Trajana A persiguí iglesia  
  • Impakto di Era Romanonan

Galationan 4:4-5 ta laga nos sa ku Dios a manda Su Yu den mundu na e momentu apropiá: “Ma ora ku e plenitut di tempu a yega, Dios a manda Su Yu, nasí di un muhé, nasí bou di Lei, pa E por a redimí esnan ku tabata bou di Lei…”  Esaki a sosodé den era romano.

Ya kaba griegu tabata e idioma prinsipal di e imperio romano, maske latin tabata idioma di e romanonan. 

  Roma a imponé su leinan riba henter su imperio.  Kompará ku otro eranan, no tabatin gueranan manera tabata e kaso den otro eranan.  E tabata un era di pas i stabilidat entre diferente nashonnan…konosí komo e era di Pax Romana (27 B.C. – A.D. 180). 

E romanonan a sòru ku e pirateria ku a pesta Laman Mediteráneo no tabata un menasá mas pa biaheronan i transporte di komersio. 

E romanonan tambe a konstruí un bon sistema di kamindanan i kareteranan.  Komo resultado, hudiunan a hiba nan Skrituranan griegu tur kaminda na e imperio. 

Tur esaki a kontribuí pa e evangelio por plama mas rápido…“e plenitut di tempu.

II.   INTRODUKSHON RELIGOSO

Diferente religion ta aparesé den Tèstmènt Nobo.  Ma nos intenshon ku e introdukshon aki ta pa yuda nos komprendé e desaroyonan religioso entre e hudiunan durante e 400 aña di silensio meimei di Tèstamènt Bieu i Tèstamènt Nobo.  Nos ya kaba a menshoná ku diferente grupo a forma durante e era aki den e religion hudiu.

A.  FARISEONAN

Fariseo ta nifiká “esnan separá.”  E grupo aki a originá for di e grupo hasidim, ku a oponé kontra helenisashon durante era di e makabeonan.  E fariseonan a konsistí prinsipalmente di laikonan manera eskribanan i “sabionan di lei” (Mateo 23:34) kende a interpretá Lei.  Nan a kompilá tradishon e reglanan verbal (komentarionan) pa apliká Skritura na diferente situation.  Nan tabata e grupo mas grandi na Israel i nan tabatin mas influensia entre e poblashon hudiu.

Kiko tabata nan kreénsianan?  Nan a rekonosé henter Tèstamènt Bieu komo inspirá pa Dios i konsekuentemente outoritario.  Purbando pa obedesé Skritura, nan a inventá hopi relga pa yuda ku aplikashon di e leinan di Skritura.  Komo resultado, nan a warda nan leinan skirbí i verbal ku mas kuidou ku nan a obedesé Skritura.  Nan tabata konosí pa nan moralidat, ritonan i legalísmo (separashon, orashon i ayuno, sabat, désimo, ets.).  Ademas, nan a kere den eksistensia di angelnan i spiritunan, inmortalidat di e alma, resurekshon di e kurpa, èts.—doktrinanan korekto.

Maske nan tabata e grupo mas fiel na Skritura na Israel den tempu di Hesus, ta visto ku Hesus a kondená nan ripitidamente pa nan hipokresia i legalismo (Mateo 15:1-11; 23:1-36).

E fariseonan tabata e úniko grupo ku a sobreviví despues di destrukshon di Yerusalèm.

B.   SADUSEONAN

E saduseonan a tuma nan nòmber for di e yunan di Zadok (2 Samuel 8:17; Ezekiel 40:46), e saserdotenan legítimo den era di David.  Maske e kantidat di saduseonan tabata ménos ku e fariseonan, nan tabatin e poder saserdotal i polítiko despues di e tempu di e makabeonan.  Nan a rechasá kualke kambio ku por menasá nan puesto.  Nan tabata despuesto pa aseptá helenisashon parsial—oponiendo kontra e hasidim—e grupo hudiu konservativo, enkabesá pa eskribanan. 

Doktrinalmente, nan a rechasá e leinan verbal di e fariseonan, rekonosiendo solamente e Pentatuk komo Skritura.  Nan tabata di opinion ku e otro bukinan di Tèstamènt Bieu ta ménos outoritario ku Pentatuk.  Nan a nenga ku angelnan i spiritunan ta eksistí.  Nan no a kere ku e alma ta inmortal ni tampoko e resurekshon di e kurpa humano.

E saduseonan no a sobreviví despues di destrukshon di tèmpel.

Ta notabel ku maske e fariseonan i sasudseonan a despresiá otro, nan a odia Hesus muchu mas i a uni forsa pa oponé huntu kontra nos Señor (Mateo 16:1; 22:34). 

C.  ESKRIBANAN

500: Internal server error

This error is generated when a script running on the server could not be implemented or permissions are incorrectly assigned for files or directories

Troubleshooting suggestions:

Temporarily disable any rewrite rules by renaming your .htaccess file if it exists.

Ensure that any CGI or Perl scripts have at least .755. permissions.

If trying to run PHP and you get this error, you may have an invalid php.ini in your /cgi-bin, or may be missing your php.dat file in this folder.